Bygdeheia kan få vindmøller

Vestavind Kraft AS som er ein av eigarane av Lutelandet Energipark har no levert førehandsmelding for Folkestad vindkraftanlegg. Dei arbeider med planar om eit vindkraftanlegg på inntil 24 turbinar på Bygdeheia aust for Lutelandet. Parken blir på om lag 70 MW med 20 til 24 turbinar.

NVE har varsla at dei vil handsama alle kosnesjonssøknader frå vindkraftanlegg i Sogn og Fjordane i 2012. Unntaket er Lutelandet Energipark som no er under handsaming i NVE, og der avgjerda er venta snart. Dersom Folkestad Vindkraftanlegg skal kome med i den handsaminga, må truleg konsesjonssøknaden leverast inn i løpet av 2011.

Straumen frå Folkestad Vindkraftanlegg skal leverast på same infrastruktur(132 kV line Lutelandet-Hålandsfossen) som straumen frå Lutelandet, og truleg skal transformatorstasjonen på Lutelandet også nyttast i samband med ei eventuell utbygging i Folkestad.

I førehandsmeldinga har Vestavind Kraft også varsla at dei vil nytte kaianlegget på Lutelandet for ta turbinane på land. Det vil truleg bety at vegen mellom Lutelandet og Furset der vegen inn i vindparken er planlagt, må opprustast kraftig.

Folkestad Vindkraftanlegg blir truleg litt større enn Lutelandet Energipark. Til saman vil dei to vindparkane i Ytre Fjaler kunne levere straum til ein middels stor norsk by.